//
you're reading...
Kebudayaan, Opini

Marsurai Bah I Sabah

Panorang ai domma salosei mambuat hasang pakon jagul i sabah.  Sihol ma use manuan omei. Sonaima ma tong pagantih-gantih gabe sada hasomalon  iparsabahan Bah Tangan Sarimatondang. Dobkonsi salosei marsuan omei, bah pe maningon totap  do mardalan hu bagas. Seng boi horah, halani anggo pala horahkonsi,  ra ma maseda atap matei omei na baru isullok ai.

Sanggah ijia, gati do hurang bah halani bahatni jolma na marsuan omei. I huluan, doras pe namin bah ai. Tapi, lambin hu toruh lambin roh moruni ma halani domma bahat ipakei hasoman i huluan. On ma sada na gati mambahen partinggilan pakon hasoman simbalog, halani marsurai bah. Masa do sapari ijaga bei sabah ni sadari manipat, mabiar horah halani ra ijujut nalegan porini ipaturut hansa sonin.

Bani  na sadari, dob tahuak dayok puho ma bapani Gompang sonai age inang ni. Somalni bapani do laho girah sogot manorih bah hu sabah. Tapi halani maseda harang ni babi  janah maningon podas ipadear ase ulang lumpat holi babi ai, Gompang ma isuruh hu sabah manggantihsi.

Gompang sanggah sinok pe itoruh ni siluban, mamugul janah mungkor homani. “Gom, Gom, puho!” nini bapani. “Ou, aha gakni Pa?” balos ni songon na rayohan. “Torih lobei bah hu sabah, ne. Ra ma horah ai da!” nini bapani mangulaki. “Yaa, naha do bapa on. Golap ope ari adi, maborgoh homani i darat” matani lalap pitpit janah sihol use ulakhononni modom. “Iin, ipapodom ambia on do use. Hei, puho ningku!” isorgang ia.

Puho ma tongon Gompang hoyam-hoyamon janah mungut-ungut. “Naha do sonon golap pe ari. Seng taridah ope dalan, bahat homani namur. Baliang ni rumah parujung ai pe ra homa mangayak” nini ibagas ungut-ungut ni on. “Seng pala mahua ai. Tongkin nari torang ma ari. Buat holi hayu-hayu idalanin  mamaspas namur. Sangkut do baliang ni halak ai anggo domma sogot ni ari, ulang pala mabiar ho. Pakei mantel ai, ase ulang borgohan ho!” nini bapani on mangeleksi.

“Boan jagul on panganon mu holi idalanin, na!” nini inangni janah iberehkon bani sada  jagul na dob tinutungan. “Ulang pala padokah tu ho ijai. Anggo domma marisi ganup sabahta ai, mintor mulak ma.” nini use mangulaki.

Dob ai hira pukul 5 sogod borhat ma Gompang hu sabah. Sabah ni ai lobih hurang sabatu han rumah. Asok-asok ia mardalan sanggah mamolus ilobei ni rumah parujung. “Tongon do hape na ihatahon bapa nongkan ai,” nini ibagas uhurni. Sangkut do baliang ai hansi lalap mangorongi sanggah mamolus ia. “In, bilangsi do baliang ho. Anggo pala do jolma ho songon au, hutoyam do pardompakanmin,” nini ibagas uhurni halani lalap sai iorongi ia.

Lang piga dokah das ma ia isabah. Tolu par opat sabah ai marisi bah pe hampit toruh, tapi i atas domma horah. Ipareksa ma hu babah ni bah i bondar, domma jujut ibaen hasoman. “Ulah ni si Reteng ai ma tong on,” nini ibagas uhurni janah ibuka jujut ni bah ai. Simbalog ni sabah ai hampit toruh, ompungan ni sada inang na dob mabalu. Seng ongga naidah tartawa atap minar bohi ni inang on. Nangnang hansa horjani porini sadihari pe pajumpah. Ai do ase isobut si Reteng ia.

Malele siang ari, tar sabatangi nari naman sabah ai na horah. “Boi ma gakni mulak au, tongkin nari mosap ma ganup on,” nini uhurni janah idugot marsuap. Sanggah manlangkah ia sihol mulak, ididah ma inang ai han nadaoh domma roh mardalan nanget-nanget hu atas. “Wah, domma roh use si Reteng ai. Maningon huhorjai lobei ia.” Sesep laho ma Gompang marbuni itoruh ni batangi.

Das ma tongon inang ai i atas irik hosah-hosah halani domma ngalutan ia manangkih dalan. Dobkonsi ididah seng ijai be jujut ni bah ai, songon na marah ma ia halani seng mardalan be bah i bondar dompak sabah ni. Itorih ma inggot, seng adong jolma. “Ise do na mambuka jujut ni bah on nongkan nani,” aima gakni ibagas uhur ni. Ijujut ma use bah ai, otik pe lang itebai dompak toruh sonai age hu sabah ni Gompang. Lang piga dokah misir ma use mulak hu sabahni.

Sanggah i dalan pe ia, luar ma Gompang humbani parbunianni. Das honsi inang ai isabahni, ibuka ma use jujut ni ai janah itebai otik hu sabah ni inang ai. “Seng ulakanni be holi hujon, nongkan pe sada-sada naman naidah hosahni,” nini uhurni. Dob ai sesep ma ia mardalan laho mulak, ase ulang sompat ididah inang ai. “Marah do Tuhan hubangku halani ulahkai nani, paotootohon sada inang na dob matua?”  aima use sungkun-sungkun ibagas uhurni. “Tapi salahni sandiri do ai. Mase otik pa lang  tebaan bani hasoman, ai ia hansa na sihol manggoluh?” Gompang, Gompang…

.

.

Surabaya, 12 Agustus 2009 — Oleh Farel M. Sinaga

Diskusi

Belum ada komentar.

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s

%d blogger menyukai ini: