//
you're reading...
Kebudayaan, Opini

Na Ija Do Hita On?

Teng, teng, teng…! Sora ni giring-giring, patugahkon parlajaran sadarion domma salosei. Yah, mintor do busisaon ganupan parlajar na i parsikolahan ai. Nongkan pitah sora ni guru do hassa tartangar, sonari usih ma songon na i tiga ondi.  Dobkonsi jongjong ganup irik  mambere hormat bani guru, marbaris ma sidea hu darat sada-sada. Das i darat, songon na megah tumang ma pangahap ni sidea.  Sagala parlajar na daoh huta ni han Sarimatondang mintor mulak bei do halani dokah nari pe sidea i pardalanan. Mardalan nahei do sidea das hu huta ni bei. Anggo liot ni Sarimatondang do, adong na mintor mulak janah adong homani piga-piga na tading, marguro-guroi pakon hasomanni.

Sonai homa age Palnut. Somalni riap do ia tong pakon Gompang mardalan sanggah mulak han sikolah. Tapi santorap on, atap halani aha gakni seng ipaima be hasoman ni ai. Mintor do  mulak sahalaksi das hu rumah.  Das i rumah ipeakhon tas ni i korsi dob ai pintor hu dapur. Pakean ni pe seng igantih opei. Itorih hubagas lamari atap aha do na boi panganon sobali indahan. Ididah adong pe tading dua nari gadung julur na iloppah nasogot. “Aih, sosok tumang ma on paima masuk indahan tongkin nari,” nini ibagas uhur ni.

Lang piga dokah dob salosei homani ia mangan, sandei ma ia bani korsi i lobei ni rumah. Gakni songon na pabosurtu do ia na mangan ai. Leneng naman naidah boltokni. Mosap homa bohini ibahen hadogas halani siakan, bahattu gakni ipangan nongkan lasina. Namatorasni haduasi seng i rumah sadari ni ai halani laho mandihuti pesta parunjukon i Manik Saribu. Sanggah marpikir-pikir ia aha do hira-hira sihorjahonon, roh ma bani pingkiranni sihol mangkail. “Huarahkon ma lobei Gompang an mangkail, ase adong hasomanku,” nini uhurni.

Dob das ia i rumah ni ai, sanggah mambasa-basa buku Gompang  jumpahsi. “Gom, eta mangkail ambia,” nini. “Huja sihol mangkail?” balos ni Gompang. “Hu Aek Bustak, hujanari be. Adong gakni na legan?” nini use. “Atap na hu Aek Simatahuting do laho mangkail Haporas. Tarsingatni mase lang ipaima ho au nongkan sanggah mulak sikolah, mintor littun ho songon naniayakan ni baliang” nini Gompang use. “Yah, ambia on. Nai ma tong ho, mintor margoni.  Domma lohean tumang au nongkan ai, songon na minggot ma huahap. Hadogasku pe songon udan naman halani gayuran. Anggo pala hupaima ho janah seng tolaphu be mardalan halani lohean, ai lang ho do holi loja mangombah au das hu rumah?’’ nini Palnut use. “Iombah untunganmu pe ho!” nini Gompang janah masuk ia hu rumah sihol marugas.

Dob sirsir ganup borhat ma sidea na dua hu Bustak, hurang lobih sabatu daoh ni. Aek Bustak on sada bongbongan na bolag janah bagas homa. Bolagni adong do 10 Ha janah bah sibagasan adong do 6 meter lobih. Seng piga dokah das ma sidea ijai. Goya bahen oppan domma sirsir hinan ibagas sada guri-guri. Dob ibere oppan, idabuh bei ma hail ni hubagas bah, dob ai soh paimahon. Dob dokah paimahon, sada ikan pe lang opei dapot sidea. Bois goya, tapi ikan seng naidah. Gakni pitah ikan Bunting hansa roh marpesta mangankon goya ni hail ai. “Husuba ma lobei hujan, ho ijon malah soh,” nini Palnut janah mosor ia bani ianan na legan, lobih hurang 20 m daoh ni. Tapi ijai pe dos do tong, seng adong ikan manggiut oppan ni hail ni. Gompang pe mulai ma homani munduh-unduh janah hoyam-hoyamon.

“Eta Gom, maridi ma lobei ase mulak hita. Mangaha hita dokah-dokah ijon. Otik pe lang marosuh ikan mangidah goyanta on,” nini Palnut. Irik hujai idanggurhon ma guri-guri ianan ni goya ai hu tongah bah janah nini, “Andon pangan, marpesta hanima ibagas in!” Dob ai maridi  ma sidea hubagas bah i bongbongan ai. Sodap ma tongon na maridi ai halani borsih tumang bah ni. “Bahat do naidah ikan  marlangei i toruh an, tapi mase lang adong na mandohori hailta? Ulang-ulang atap na lang maridi do ho nasogot,” nini Gompang dompak Palnut. “Yaa, na rado hutenju holi osang-osangmin da, ihatahon ho au lape maridi,” nini bani Gompang. Gompang domma mintor podas misir hu darat janah kehkehan.

Dob salosei maridi, mulak ma sidea. Sanggah mardalan, adong ma ididah Palnut sada bona ni bagod na dob iagati i tongah ni juma. Taridah tangkas domma adong buluh pananggoan ni bagod i atas. “Paima ijon lobei, hujan au tongkin,” nini Palnut janah misir ia dompak bona ni bagod ai. Sungkun-sungkun Gompang ibagas uhurni, “ Laho huja do nani nasalakan on?” Tapi sonaipe sip do hansa ia irik ididah huja Palnut laho. Dob das ia i bona ni bagod ai, mintor manangkih ma ia hu atas. Das ijai ididah i bagas buluh domma marisi bagod lobih satongah. Ibuat ma buluh ai, ihadanghon janah nanget-nanget ma ia turun hu toruh.

Dob satongah dalan ia turun, nini ma bani Gompang, “Gom, hujon lobei ho. Tangkap lobei buluh on ambia, domma ngayotan au.” Tapi nini Gompang ma mambalosi, “Ai mase buaton mu bagod in ambia, ai sedo bageanta in. Anggo pala ididah ompunganni, bois ma hita imarahi holi!” “Seng pala mahua ai, tutur Tulangta do ai. Porini roh ia holi hatahon hitalah, horas Tulang, ibuat hanami bagodmu halani domma horahan tumang hanami,” nini Palnut on use.  Roh ma tongon Gompang mangayaki Palnut janah itangkap ma buluh ianan ni bagod ai.

Das honsi itoruh, mintor isobur Palnut ma bagod ai han bagas buluh. Dob minum ia piga-piga  dorguk, iberehon ma buluh ai bani Gompang. “Nah, andon ambia. Suba lobei. Mattin tumang, matobu,” nini.  Ihatahon matobu, Gompang pe seng ra homani hatadingan. Mintor itatang ma buluh ai, ipadohor dompak babah ni janah mintor idorguk homani piga-piga hali. Dob ai hundul ma sidea songon na marsaran tongkin itoruh ni bagod ai. Boltokni pe domma gojong iahap halani bahatni bagod iinum. “Holi ulakhon hita use, adong  pe saparopat nari tading ibagas buluh on,” nini Palnut.

Tapi seng piga dokah sidea na soh on, mulai ma songon na mayap-ayap pangahap ni sidea.  “Minggot tumang ulungku huahap,” nini Gompang. “Au pe sonai do homa,” nini Palnut janah ijolomi uluni. Dob ai ipagallei sidea nadua ma itoruh ni bagot ai, lanjar mintor tarpodom. Domma mulai golap ari, tapi sidea nadua sinok tumang opei. Rongit domma bahat mallutungi sidea. Hira pukul 7 borngin, tarpuho ma Gompang. Tarsonggot ia dob ididah Palnut sinok opei ilambungni. Dob tarjolma ia bahasa domma golap ari, tapi seng ibagas rumah, roh ma biarni. Ipuhoi ma Palnut, “Pal, Pal. Na ija do hita on? Puho podas, domma golap ari!” nini ma dompaksi.

Puho ma tongon Palnut on, dob ai songon na taroto ma ia tongkin. Ikawahkon inggot, suan-suanan ganup. Tarsonggot ma ia dobkonsi ibotoh, itongah ni juma opei sidea. Jongjong ma ia,  iarahkon ma Gompang mulak. Mulak ma sidea idugot mabiar halani dalan pe seng pala torang be ididah. Ipinggir dalan malele huta, adong sada hayu banggal maningon laosan. Ongga ibogei sidea  barita, bahasa hayu banggal ai ianan parsinumbahan. Girgir tumang pangahap sidea dob lambin dohor bani hayu ai. Das honsi ijai, mintor marlintun ma Palnut  janah nini, “Eta, podaskon, marlintun ho! Idadap holi tanggurungmin hanpudi!” Mintor ma tongon marlintun sidea songon halisungsung halani biar ni.

Lobih hurang pukul 8 borngin das ma sidea i huta. Namatorasni pe domma busisaon torih-torih. Isungkuni hasoman sada pe lang mambotoh huja sidea laho. Das i huta mintor masuk ma sidea hu rumah ni bei. Das honsi Gompang i rumah roh ma inang ni manungkunsi, “Hunja do hanima nadua nongkan, Gom. Mase sonai dokah ni ase mulak? Bapani sip hassa halani domma ipalumba inangni hinan ase ulang imarahi ia. Ipatugah Gompang ma ganup namasa ai bani  namatorasni. “Tarpodom hanami ibonani bagod halani bagodon. Tapi sedo au mambuat bagod ai, Palnut do,” nini janah mabiar. “Iinum hanima bagod sanggah baru ibuat pe han atas?” isungkun bapani ia. “Eak Pa, ai mattin tumang idai hanami halani matobu. Paima ai, domma horahan hanami dob salosei mangkail,” nini.

“Gom, bagod na baru ibuat han bonani seng boi mintor inumon.  Na ijual i kode tuak ai pe seng mintor han bonani iboban hujai. Ibahen do lobei sampuranni songon bah pakon raru ase boi inumon,” nini bapani irik mangupir mangidah parlahou ni sidea. “Sonari eta hu rumahni ompungan ni bagod ai. Maningon mangaku salah hanima, halani domma loja ia maragat  ipabois hanima bagodni. Iarahkon ma homa Palnut, ase riap sidea hujai. Das honsi i rumah ai, ipatugah bapani Gompang on ma ganup namasa ai janah sihol ma ia pasuanghon harugian ni paragat ai. Palnut pakon Gompang on sip hassa, domma gobor imarahi. Tapi paragat ai seng marah, gariada tartawai ia use dob ibotoh namasa ai. “Seng pala pasuangon mu ai dahkam, paturut ham ma gelah. Parlajaran ma ai bani sidea nadua, ase ulang iulakhon be sonai,” nini. “Hanima nadua, uttung ma lang roh ulog modom hutongah-tongah nima. Seng ongga itangar hanima adong ulog na banggal ijai?” nini dompak sidea nadua.

Surabaya, 21 Agustus 2009 – Oleh Farel M. Sinaga

Diskusi

Belum ada komentar.

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s

%d blogger menyukai ini: