//
you're reading...
Geografi dan Lingkungan, Kebudayaan, Kisah Nyata, Perjalanan, Personal, Ruang Santai

Ito, Aha Do B-4 On?

Nunga antar leleng nian na masa on. Molo so sala taon 2001 ma ra i, andorang di Bengkulu do pe au martugas. Somalna molo jonok ma ari Natal manang Tahun Baru, antor binuat ma cuti sian kantor asa boi mulak pasombu sihol tu natua-tua i di Sarimatondang. Mudik, inna halak dison. I ma jolo taringot tusi!

Di na sadari, borhat ma hami tutu sakeluarga sian Bengkulu mar mobil. Au, boru ni raja i, dakdanak opat halak tamba sada dongan marga Sidauruk. Jadi pitu halak ma hami na borhat i. Ia si Sidauruk on marpariban do pe ibana dohot au, ala rap marboru Purba do hami. Alai tutu di ibana Purba Pakpak jala di au Purba Tambak. Jala sarupa muse do dohot parbagak nasida, hehehe. Sai hutogihon do tong ibana molo mulak  hami tu huta manang borhat tu luat na asing na dao sian Bengkulu. Jadi molo dung loja di pardalanan, marganti ma hami manupiri mobil. Sai songoni ma jotjot binahen molo nunga ngeal nihilala songon na paulak gogo…

Adong do dua dalan molo mulak tu hita an. Sada ma i Jalinbar (Jalur Lintas Barat), i ma sian Bengkulu Utara tombus tu Propinsi Jambi – Painan – Padang – Padang Panjang – Bukit Tinggi – Lubuk Sikaping – Panti – Muara Sipongi – Kotanopan – Panyabungan – Padang Sidempuan – Sipirok – Sarulla- Tarutung sahat tu Sarimatondang. Molo sian on, somal na maradi jala marborngin do hami di Bukit Tinggi ala nunga dapot borngin. Disi poltak mataniari dimanogotna, diuduti ma muse pardalanan.

Alai ingkon manat-manat do iba molo mardalan sian on Tuan Nami, ala godang ni lombu. Disi haruar sian Bengkulu Utara holan lombu na ma berengon di pardalanan. Jala adong do marratus bilangan na. Sipata, di dalan aspal do muse nasida mardalan jala songoni do dipasombu angka parmahan na disi. Pas ma tutu songon na di Texas i berengon, molo tinonton film Cowboy Western na jolo!

Taringot tu na manonton film Cowboy andorang doli-doli dope, dung sae film ruar ma iba tutu sian gedung bioskop. Bah, holan sahat di luar mardalan pe gabe dohot-dohot ma iba muse songon cowboy na di film i. Tar nipanaek ma saotik abara on haduassa huhut pinaunduk saotik tingki mardalan, jala dang manaili tu siamun manang tu hambirang. Dung i songon na pinabais ma muse molo disese angka dongan, jala tangan pe haduassa pinamasuk ma tu saku ni salawar. Amang tahe, molo niingot nian na jolo i!

Molo dalan na sada nari digoar Jalinteng (Jalur Lintas Tengah), i ma sian Kepahyang – Curup – Lubuk Linggau – Sarolangun – Bangko – Kiliran Jao – Pekanbaru – Duri – Balam – Kota Pinang – Aek Nabara – Rantau Prapat – Aek Kanopan – Kisaran – Perdagangan – Pematang Siantar – Sarimatondang. Jala santulakon, sian on do hami mardalan asa boi maradi huhut marborngin di bagas ni anggiku si nomor tolu – Amani Zico Sinaga di Pekanbaru.

***

Marhira pukul 12.00 tonga ni ari haruar ma hami sian Sumatera Selatan jala masuk tu Propinsi Jambi. Tabo ma nian molo mardalan sian Jalur Lintas Tengah Sumatera on. Dang pola godang mobil binereng di pardalanan jala sahira iba nama nampuna dalan i. Jala muse adong do marpulu kilometer dalan on tigor songon balobas ni anak singkola. Dang adong belokan tu siamun manang hambirang, alai tutu satongkin nangkok satongkin nari tuat muse. Pas ma tutu songon na marsolu di Tao Toba tingki doras ni alogo.

Dang piga leleng songon na male ma butuha nihilala. “Pananget ma saotik Anggia, asa boi mangalului parmanganan huhut maradian satongkin,” ningku ma tu Sidauruk. Dipananget ibana ma mobil on jala au pe huhut ma mamereng-mereng tu siamun dohot hambirang. Dang piga leleng tarhira-hira mandapothon Bangko Propinsi Jambi ma ra on, adong ma tarbereng au sada kode sabola siamun jala tarsurat disi Lapo. “Bah, nunga ibana on!” inna rohangku. Hupangido ma tu Sidauruk asa so hami disi. Ia lapo on di jolo na tambal ban huhut manggadis bensin dohot solar.

Masuk ma hami tutu tu lapo i jala husungkun angka aha ma na adong disi. Hubereng disada papan na gantung disi tarsurat “Sadarion adong B-1, B-2 dohot B-4”. Molo B-1 dohot B-2 nian somal do binege. Alai molo B-4? Jadi sai hupingkir-pingkiri ma, antar aha ma nuaeng lapatan ni B-4 on. Alai ala so boi taralusi jala nunga geok panghilalaan, husungkun ma tutu inanta par lapo i. “Taringot na jolo Ito, ai aha do lapatan ni B-4 on?” “Bah, dang diboto hamu aha B-4?” alus ni inanta on. “Babi boru-boru do i, Ito!” inna ma muse manguduti. “Daga puang, nunga dikarejoi halakon au..!”

 

Surabaya, 14 Desember 2010 – Oleh Farel M Sinaga

Diskusi

Belum ada komentar.

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s

%d blogger menyukai ini: